ശ്രീനാരായണഗുരു

പാരിൽദ്ധർമ്മമുയർത്തുവാൻ യദുകുലേ പണ്ടെന്നപോലീഴവ-

ന്മാരിൽ സ്വാമി പിറന്ന മാസമതിലാണേവർക്കുമോണോത്സവം;

ആരിവ്വണ്ണമഖണ്ഡമംഗളനഹോ?സദ്യോഗവിദ്യാമൃതം

പൂരിക്കും പുതുചന്ദ്രനേ,ജയ ചിരം നാരായണശ്രീഗുരോ!

വള്ളത്തോൾ

ഒരു സുന്ദരി

ലാവണ്യക്കടലില്ക്കളങ്കമിയലാതുണ്ടായ വാർതിങ്കളോ,

പൂവമ്പന്റെ പുകഴ്ച കാട്ടി വിലസും പുത്തൻ കൊടിക്കൂറയോ,

ദൈവത്തിന്റെ വിചിത്രസൃഷ്ടിവിരുതോ,ശൃംഗാരസൂക്തോന്മിഷൽ-

ക്കൈവല്യപ്പൊരുളോ,നമുക്കെതിരിലിക്കാണാകുമേണാക്ഷിയാൾ?

-വള്ളത്തോൾ (വിലാസലതിക)

ആശാന്റെ ശവകുടീരം

കണ്ണെത്താത്ത കയങ്ങളും കരകളെപ്പുല്കിക്കുളിർപ്പിച്ചിടും

കല്ലോലങ്ങളുമാർന്നിടുന്ന പുഴ തന്നേകാന്ത തീരത്തതാ

കണ്ടാലും ഗഗനം കുനിഞ്ഞു മുകരാൻ വെമ്പും കുടീരം,വെറും

കല്ലിൽ ഗ്രാമകരങ്ങൾ വേദനകളാൽ തീർത്തുള്ളൊരാ സ്മാരകം.

-തിരുനല്ലൂർ കരുണാകരൻ